Mae datblygu sgiliau ymarferwyr y dyfodol yn y diwydiant cerddoriaeth yn amcan craidd i ni fel elusen. Yn aml, y llwybrau mae sefydliadau llawr gwlad yn eu cynnig yw’r profiad ymarferol cyntaf i lawer, ac mae’n gam hollbwysig i mewn i’r sector diwylliannol.

Ar y llwyfan a thu ôl i’r llen, rydyn ni’n ymroddedig i gynnig cyfleoedd hyfforddiant a chyflogaeth i ddarpar beirianwyr cerdd, technegwyr goleuo, cynrychiolwyr digwyddiadau, ffotograffwyr, perfformwyr a mwy. 

Darllenwch fwy am y cyfleoedd sydd ar gael yng Nghlwb Ifor a’n rhaglenni datblygu sgiliau.

Hyfforddiant

Rydyn ni’n cynnig sesiynau cysgodi i dechnegwyr sain a goleuo sy’n chwilio am brofiad gwaith yn y diwydiant cerddoriaeth. Mae’r sesiynau yma’n cynnig profiad o weithio mewn amgylchedd proffesiynol gyda pheirianwyr sain a thechnegwyr goleuo blaenllaw, o dasgau llwytho i mewn a llwytho allan, i drosglwyddo rhwng artistiaid ar y llwyfan. Cysylltwch â ni am fwy o fanylion.

Gwirfoddoli

Ochr yn ochr â llenwi’r brifddinas gyda cherddoriaeth fyw anhygoel, mae Gŵyl Sŵn yn ymroddedig i greu cyfleoedd cyffrous i wirfoddoli drwy gydol y penwythnos. Bob blwyddyn, mae Gŵyl Sŵn yn gweithio gyda hyd at 60 o wirfoddolwyr, ar draws pum prif faes yr ŵyl:

• Cysylltiadau Cwsmeriaid
• Cyswllt Artistiaid
• Marchnata
• Cynhyrchu
• Sesiynau Diwydiant

Yn 2023, rydyn ni’n bwriadu ehangu ein darpariaeth, gan gydweithio gyda Phrifysgol De Cymru a Rhaglen Resonant sy’n cael ei chynnal gan Beacons Cymru, i rymuso’r bobl sy’n chwilio am brofiad yn y diwydiant cerddoriaeth a chynnig cyfleoedd ymarferol yn ystod penwythnos yr ŵyl.

Sesiynau Diwydiant Cerddoriaeth

Rydyn ni’n hoff o gerddoriaeth, ond rydyn ni’n hoff o drafodaeth banel hefyd! 

Mae Sesiynau Diwydiant Cerddoriaeth Clwb Ifor yn ganolog i’n gwerthoedd craidd. Ochr yn ochr â’r rhaglen gerddoriaeth yng Ngŵyl Sŵn, ein nod yw trafod a thaflu goleuni ar y gwahanol lwybrau i’r diwydiant cerddoriaeth. 

Gan weithio gyda’r partneriaid a’r sefydliadau gorau yn y sector, nod y gynhadledd yw ysbrydoli mwy o bobl i gymryd eu cam cyntaf i’r diwydiant cerddoriaeth, gan gyfeirio at y cymorth a’r cyfleoedd sydd ar gael. Rydyn ni hefyd yn bwriadu cynnal cyfres o ddigwyddiadau untro drwy gydol y flwyddyn yn dilyn digwyddiad eleni.

Merched Yn Neud Miwsig

Gan weithio mewn partneriaeth â’r Eisteddfod Genedlaethol, ein nod yw annog mwy o ferched ifanc i greu a pherfformio cerddoriaeth Gymraeg. Gan gynnal cyrsiau undydd a chyrsiau preswyl, rydyn ni’n cynnig lle diogel i ferched ddysgu sgiliau newydd a chwrdd ag eraill sydd hefyd yn awyddus i greu, cynhyrchu, a pherfformio cerddoriaeth newydd. Rydyn ni’n cysylltu pobl ifanc ag ymarferwyr cerdd blaenllaw, ac ers 2018, rydyn ni wedi bod yn helpu merched i gamu i’r llwyfan gyda sgiliau a hyder newydd.

Bydd y digwyddiad nesaf yn cynnwys gweithdy undydd ac arddangosiad gyda’r nos yng Nghlwb Ifor Bach ym mis Medi, ar ôl derbyn cyllid gan Tŷ Cerdd.

Gweithdai

Mae llwyddiant Merched yn Neud Miwsig wedi’n galluogi ni i gael cyllid i gynnal prosiectau tebyg ar gyfer unrhyw berson ifanc yng Nghymru sydd â diddordeb mewn creu cerddoriaeth drwy gyfrwng y Gymraeg. 

Ar ôl derbyn cyllid gan Anthem, roedd modd i ni gynnal dau gwrs preswyl mewn partneriaeth â Maes B ac Urdd Gobaith Cymru. Yn seiliedig ar gyrsiau tebyg a wnaed drwy raglen Merched yn Neud Miwsig, roedd rhain yn agored i unrhyw un oedd yn dymuno meithrin dealltwriaeth a gwybodaeth am sut i greu, cynhyrchu a pherfformio cerddoriaeth. Yn dilyn adborth cadarnhaol gan y bobl a fu ar y cwrs, rydyn ni’n gobeithio datblygu cyfleoedd pellach i ehangu’r cwrs yma yn y dyfodol agos.