Sefydlwyd Clwb Ifor Bach yn wreiddiol fel Cymdeithas Anghorfforedig yn 1983, ond mae bellach yn gweithredu fel Sefydliad Corfforedig Elusennol nid-er-elw. Rydyn ni’n ddiolchgar iawn i’n Bwrdd Ymddiriedolwyr am eu hamser a’u cefnogaeth.

 

---

 

Sion Tudur (Cadeirydd)
Yn gyfreithiwr corfforaethol ac yn bartner gyda chyfreithwyr Hugh James yng Nghaerdydd, mae Sion wedi bod yn aelod o fwrdd Clwb Ifor Bach ers 2008.

 

Andy Elliot
Mae Andy’n aelod achrededig o CIPR, ac mae ganddo brofiad helaeth yn darparu cymorth cysylltiadau cyhoeddus, cyfathrebu, ac ymgysylltiad cymunedol i brosiectau datblygu ac adfywio graddfa fawr. Mae wedi gweithio gyda sawl elusen a sefydliad nid-er-elw, ac mae ganddo ddiddordeb arbennig yn y celfyddydau, diwylliant, ac ymgyrchoedd achos da. 

 

Catrin Rogers
Ganwyd Catrin yng Nghaerdydd, ac aeth i Brifysgol Caeredin i astudio Llenyddiaeth Saesneg, cyn hyfforddi fel newyddiadurwr ym Mhrifysgol Caerdydd a gweithio fel newyddiadurwr yn Llundain, Glasgow a ’nôl adre yng Nghymru. Wedi hynny aeth Catrin i fyd cysylltiadau cyhoeddus ym maes y celfyddydau, gan ddod yn swyddog y wasg i National Theatre Wales am ddegawd, ers ei lansio yn 2009. Yna aeth i weithio yng Nghanolfan Mileniwm Cymru, gan ddod yn uwch reolwr cyfathrebu, cyn mynd yn llawrydd yn haf 2022.

 

Lara Herde
Yn eiriolwr amlwg dros y sîn gerddoriaeth lawr gwlad yng Nghymru, dechreuodd Lara ym maes Llywodraethu a Chyllido’r Trydydd Sector, cyn symud tuag at hyrwyddo cerddoriaeth ar ôl cyflawni MBA mewn Rheolaeth yn y Celfyddydau. Ers hynny, mae Lara wedi arwain ar y gwaith o ailwampio adeilad eiconig Neuadd y Frenhines yn Arberth, sy’n safle elusennol sefydledig yn y gorllewin. Mae Lara hefyd yn Gyflwynydd Radio rhan amser.

 

Leigh Jones

Cyn troi at newyddiaduraeth, roedd gan Leigh ddeuddeg mlynedd o brofiad yn gweithio yn y diwydiant cerddoriaeth ym maes recordiau a chyhoeddi. Gan ddechrau drwy ryddhau cerddoriaeth ei hun, aeth ymlaen i weithio i labeli fel Universal, Warners a BMG, yn ogystal â gweithio fel arbenigydd cerddoriaeth Gymraeg ar gyfer PRS For Music.

Lucy Price
Yn hanu o’r gorllewin yn wreiddiol, mae Lucy’n byw yng Nghaerdydd ers cyflawni astudiaethau ôl-raddedig yng Ngholeg Brenhinol Cerdd a Drama Cymru. Ar ôl gweithio mewn nifer o swyddi datblygu a chodi arian mewn gwyliau a lleoliadau celfyddydol a cherddoriaeth ledled y de ac ym Mryste, mae Lucy wedi symud ffocws ei gyrfa yn ddiweddar, ac mae bellach yn gweithio i Lywodraeth Cymru ym maes polisi.

 

Lucy Squire
Mae Lucy’n weithiwr proffesiynol yn y Diwydiannau Creadigol, ac mae ganddi gefndir cyfreithiol a hanes ym maes busnes ac addysg. Mae’n gyfranogwr gweithgar yn ecoleg gerddorol y de, ac mae hi wedi rhedeg sawl cwmni llwyddiannus ym maes manwerthu, digwyddiadau a label recordio, a’r mwyaf nodedig o’u plith oedd Catapult, a oedd wedi’i leoli yn un o arcedau enwog Caerdydd. Mae Lucy’n eistedd ar Fwrdd Cerddoriaeth Cyngor Caerdydd, ac mae’n Bennaeth Cerdd a Drama ym Mhrifysgol De Cymru ar Gampws yr ATRiuM yng Nghaerdydd.

 

Matthew Phipps
Mae Matthew’n bennaeth ar Dîm Trwyddedu Cymru a Lloegr TLT. Mae’r tîm wedi’i gydnabod fel arweinydd o ran arfer cenedlaethol. Mae hefyd yn Ymddiriedolwr ac yn Gydymaith Sefydliad Tafarnwyr Prydain, yn swyddog cyfreithiol ar gyfer Cymru yn y Sefydliad Trwyddedu, ac yn gyn-ysgrifennydd i Grŵp Hollbleidiol Bwyd a Diod Cynulliad Cymru.

 

Tracey Marsh
Mae gan Tracey gyfrifoldeb am strategaeth a rheolaeth ariannol yng Nghyngor Gweithredu Gwirfoddol Cymru, ac mae ganddi ugain mlynedd o brofiad yn gweithio yn y sector preifat a’r trydydd sector. Cymhwysodd Tracey gyda Deloitte, ac mae wedi gweithio i enwau adnabyddus fel Kellogg’s, Trinity Mirror a Techniquest.